Vrasje, dhunim e keqtrajtim të civilëve gjatë luftës

Dërgesa

Qyteti

Përgjigjet

Vlerësimi

★ 0.0 · 0 vlerësimet

jakovasot Vrasje, dhunim e keqtrajtim të civilëve gjatë luftës – Sot më 28 shtator seanca ndaj Muharrem Ibrajt Në Gjykatën Themelore në Prishtinë është caktuar për më 28 shtator seanca ndaj Muharrem Ibrajt, të akuzuar për krime lufte kundër popullsisë civile në fshatin Osek Hylë të Gjakovës. Seanca pritet të mbahet nga ora 09:30, në sallën D17 të Pallatit të Drejtësisë, nën kryesimin e gjyqtares Violeta Namani Hajra. Siç ka raportuar Sinjali, gjykata i ka bërë thirrje Ibrajt që të dorëzohet para organeve të ndjekjes, në mënyrë që procedura të zhvillohet në praninë e tij. Qytetarëve që kanë informacione për vendndodhjen e tij u është kërkuar t’i njoftojnë organet kompetente. Aktakuza e Prokurorisë Speciale, e ngritur më 19 mars 2025, e ngarkon Ibrajn për krime ndaj civilëve shqiptarë gjatë periudhës 1998–1999, në bashkëkryerje me pjesëtarë të forcave serbe. Sipas përmbledhjes së aktakuzës në raportin e Fondit për të Drejtën Humanitare Kosovë, njëra pikë lidhet me vrasjen e një civili më 28 shkurt 1998 në Osek Hylë. Prokuroria pretendon se Ibraj kishte qëlluar viktimën me armë automatike në praninë e familjarëve. Civilë të tjerë pretendohet se ishin rrahur dhe dërguar në stacionin policor, ku ishin keqtrajtuar gjatë marrjes në pyetje. Një pikë tjetër e ngarkon për dhunimin e një gruaje shqiptare gjatë nëntorit 1998, në bashkëkryerje me babanë dhe vëllanë e tij. Prokuroria ka propozuar dëgjimin e dhjetë dëshmitarëve, njëkohësisht të dëmtuar në këtë proces. Ibraj prezumohet i pafajshëm derisa fajësia e tij të vërtetohet me vendim të formës së prerë.
35 ditë